ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសំដែងការសោកស្ដាយមនិងក្រើនរំលឹកឲ្យអាជ្ញាធរមានការបង្កើនការយកចិត្តទុកដាក់ប្រុងប្រយ័ត្ន ជាពិសេសនៅក្នុងពេលដែលមានទឹកជំនន់ ដើម្បីការពារអាយុជីវិតពលរដ្ឋ។

ថ្លែងក្នុងពិធីប្រគល់សញ្ញាបត្រជូននិស្សិតសកលវិទ្យាល័យជាតិគ្រប់គ្រង ព្រឹកថ្ងៃទី១៧ ខែតុលានេះ សម្ដេចតេជោ ហ៊ុន សែន បានចំណាយពេលប្រមាណ ១០វិនាទីដើម្បីគោរពវិញ្ញាណក្ខន្ធដល់សិស្សទាំង ១១នាក់ដែលបានស្លាប់ក្នុងហេតុការណ៍លិចទូកក្នុងស្រុកលើកដែក ខេត្តកណ្ដាល។ 

សម្ដេចបានចាត់ទុកហេតុការណ៍នេះ គឺជាសោកនាដកម្មមួយសម្រាប់ប្រទេសកម្ពុជា ក្នុងនោះផងដែរសម្ដេចក៏បានថ្វាយអំណរគុណដល់ព្រះមហាក្សត្រ និងសប្បុរសជនដែលបានចូលរួមរំលែកទុក្ខក៏ដូចជាចូលរួមជួយទៅដល់ក្រុមគ្រួសារជនរងគ្រោះផងដែរ។ 

សម្ដេចក៏លើកឡើងផងដែរថា ព្រឹត្តិការណ៍នេះក៏បានបង្ហាញពីស្មារតីសាមគ្គីភាពក្នុងចំណោមរបស់ប្រជាជនកម្ពុជាដែលបានឈឺឆ្អាលទៅលើសុខទុក្ខរបស់ប្រជាជន។ 

ករណីលិចទូកដរទទឹង ដែលបានកើតហេតុកាលពីវេលាម៉ោងប្រមាណ ៧ល្ងាច​ ថ្ងៃទី១៣ ខែតុលា ឆ្នាំ២០២២ ស្ថិតនៅចំណុច ទូកដរទទឹងស្ថិតនៅ ភូមិកោះចំរើន ឃុំកំពង់ភ្នំ ស្រុកលើកដែក បណ្ដាលឱ្យលិចទូកដរ បានបណ្ដាលឱ្យសិស្សសាលាចំនួន ១១នាក់បានស្លាប់បាត់បង់ជីវិត។ 

បច្ចុប្បន្នអាជ្ញាធរបានឃាត់ខ្លួនម្ចាស់ទូក និងអ្នកបើកបរទូកសរុបចំនួន ៣នាក់ទៅអធិការដ្ឋាននគរបាលស្រុកលើកដែកដើម្បីសួរនាំ៕ 

^{PHOTO: EAC NEWS}